યુક્રેન પર હુમલો કરનાર રશિયાએ હવે સ્વીડન અને ફિનલેન્ડને ચેતવણી આપી છે. રશિયાએ કહ્યું છે કે જો બંને દેશો નાટોમાં જોડાય છે તો તેમના પરિણામો યુક્રેન જેવા ભયંકર હશે.
મીડિયા રિપોર્ટ્સ અનુસાર, રશિયન વિદેશ મંત્રાલય દ્વારા સ્વીડન અને ફિનલેન્ડને નાટોમાં સામેલ ન થવા માટે કહેવામાં આવ્યું છે.
જો આમ થશે તો તેના પરિણામો ભયંકર આવશે. ક્રેમલિનનું નિવેદન એવા સમયે આવ્યું છે જ્યારે રશિયન દળો યુક્રેનની રાજધાની કિવમાં ઘૂસી ગયા છે અને કબજાનું યુદ્ધ અંતિમ તબક્કામાં છે.
રશિયાએ યુક્રેનના રાષ્ટ્રપતિ વોલોડીમિર ઝેલેન્સકીને સત્તા પરથી હટાવવા માટે યુદ્ધને વધુ તીવ્ર બનાવ્યું છે. અહેવાલ છે કે રશિયન પેરાટ્રૂપર્સ કિવમાં પ્રવેશ્યા છે. દરમિયાન રશિયા તરફથી પણ મંત્રણા માટે પ્રતિનિધિમંડળ મોકલવાની વાત થઈ છે.
સ્પુટનિકના અહેવાલ મુજબ, પુતિન ટૂંક સમયમાં ઝેલેન્સ્કી સાથે વાતચીત માટે તેમનું પ્રતિનિધિમંડળ મોકલી શકે છે.
ક્રેમલિનના પ્રવક્તા દિમિત્રી પેસ્કોવના જણાવ્યા અનુસાર, વિદેશ મંત્રાલય, સંરક્ષણ અને વહીવટી અધિકારીઓ સહિત એક રશિયન રાજદ્વારી પ્રતિનિધિમંડળને યુક્રેન સાથે વાતચીત માટે મિન્સ્ક મોકલવામાં આવી શકે છે.
રશિયા દ્વારા એવી અપીલ કરવામાં આવ્યા બાદ આ નિવેદન આવ્યું છે કે જો યુક્રેન આત્મસમર્પણ કરવા તૈયાર હોય તો તે વાતચીત માટે તૈયાર છે. જોકે, યુક્રેને આ ઓફર ફગાવી દીધી હતી.
યુક્રેનના રાષ્ટ્રપતિ ઝેલેન્સકીએ કહ્યું કે આજની રાત અન્ય તમામ દિવસો કરતાં વધુ મુશ્કેલ હશે. આપણા દેશના ઘણા શહેરો હુમલાની ઝપેટમાં છે.
શેરનિહિવ, સુમી, ખાર્કિવ, ડોનબાસ, દેશના દક્ષિણમાં સ્થિત શહેરો પણ. પરંતુ અમે અમારી રાજધાની કિવને ગુમાવી શકીએ નહીં.