આંતરરાષ્ટ્રીય બજારમાં ક્રૂડ ઓઈલના દરમાં વધારાની હજુ રિટેલ ગ્રાહકો પર કોઈ અસર થઈ નથી, પરંતુ જથ્થાબંધ વપરાશકારોને મોટો ફટકો પડ્યો છે. ઓઈલ માર્કેટિંગ કંપનીઓએ જથ્થાબંધ વપરાશકારો માટે ડીઝલની કિંમતમાં 25 રૂપિયા પ્રતિ લીટરનો વધારો કર્યો છે. સમાચાર એજન્સી પીટીઆઈએ સૂત્રોના હવાલાથી પોતાના એક અહેવાલમાં આ માહિતી આપી છે. જોકે, પેટ્રોલ પંપ પર રિટેલ યુઝર્સ માટે દરમાં કોઈ વધારો કરવામાં આવ્યો નથી.
દિલ્હીમાં બલ્ક યુઝર્સ માટે ડીઝલની કિંમત 115 રૂપિયા સુધી પહોંચી ગઈ છે. તે જ સમયે, પેટ્રોલ પંપ પર ડીઝલ 86.67 રૂપિયા પ્રતિ લીટરના ભાવે વેચાઈ રહ્યું છે. મુંબઈમાં જથ્થાબંધ વપરાશકારોને વેચવામાં આવતા ડીઝલની કિંમત વધીને 122.05 રૂપિયા પ્રતિ લિટર થઈ ગઈ છે, જ્યારે પેટ્રોલ પંપ પર વેચાઈ રહેલા ડીઝલની કિંમત 94.14 રૂપિયા પ્રતિ લિટર છે.
ડિફેન્સ, રેલવે અને ટ્રાન્સપોર્ટ કોર્પોરેશન, પાવર પ્લાન્ટ, સિમેન્ટ પ્લાન્ટ અને કેમિકલ પ્લાન્ટ મુખ્યત્વે બલ્ક ગ્રાહકોમાં સામેલ છે. ઓઇલ માર્કેટિંગ કંપનીઓ વધુ માત્રામાં તેલનો વપરાશ કરતા ગ્રાહકોની જરૂરિયાતોને અલગથી પૂરી કરે છે. કંપનીઓ આ ગ્રાહકો માટે તેલના સંગ્રહ અને હેન્ડલિંગ માટે વિશેષ વ્યવસ્થા કરે છે.
આ મહિને પેટ્રોલ પંપ પર ઈંધણનું વેચાણ વધ્યું છે. તેનું કારણ એ છે કે બસ ઓપરેટરો અને મોલ જેવા જથ્થાબંધ વપરાશકારો ઓઈલ કંપનીઓ પાસેથી સીધું ઓઈલ ઓર્ડર કરવાને બદલે પેટ્રોલ પંપ પરથી ઈંધણ ખરીદે છે. તેનાથી છૂટક વેપારીઓની ખોટમાં વધુ વધારો થયો છે.