હાલમાં ભારતમાં પેટ્રોલ અને ડીઝલની વધતી કિંમતોને કારણે હાહાકાર મચી ગયો છે. સરકારી તેલ કંપનીઓએ 22 માર્ચથી દેશમાં તેલના ભાવમાં 14 વખત વધારો કર્યો છે અને મહારાષ્ટ્રના પરભણીમાં પેટ્રોલની કિંમત 122 રૂપિયા પ્રતિ લિટરથી વધુ પહોંચી ગઈ છે. આવી સ્થિતિમાં સવાલ એ થાય છે કે આપણા પાડોશી દેશોમાં પેટ્રોલ કયા ભાવે મળી રહ્યું છે.
4 એપ્રિલે પાકિસ્તાનમાં પેટ્રોલની કિંમત 62.53 રૂપિયા પ્રતિ લીટર હતી, જે ભારત કરતા લગભગ અડધી છે. એટલું જ નહીં, ગંભીર આર્થિક સંકટનો સામનો કરી રહેલા પાડોશી દેશ શ્રીલંકામાં પેટ્રોલની કિંમત 75.53 રૂપિયા પ્રતિ લીટર છે. આ સિવાય બાંગ્લાદેશમાં પેટ્રોલ 78.53 રૂપિયા પ્રતિ લિટર, ભૂટાનમાં 86.28 રૂપિયા અને નેપાળમાં 96.80 રૂપિયા પ્રતિ લિટરે વેચાઈ રહ્યું છે. જો કે ચીનમાં પેટ્રોલની કિંમત 110 રૂપિયા પ્રતિ લીટરથી વધુ છે.
ભારતમાં ઓઈલ કંપનીઓએ છેલ્લા 16 દિવસમાં પેટ્રોલ અને ડીઝલના ભાવમાં 10.20 રૂપિયા પ્રતિ લીટરનો વધારો કર્યો છે. આ પછી દિલ્હી-મુંબઈ સહિત દેશના લગભગ તમામ શહેરોમાં પેટ્રોલની કિંમત 100 રૂપિયા પ્રતિ લીટરથી વધુ પહોંચી ગઈ છે.
દુનિયાના ઘણા એવા દેશ છે જ્યાં એક લીટર પેટ્રોલની કિંમત 200 રૂપિયાથી વધુ પહોંચી ગઈ છે. હોંગકોંગમાં પેટ્રોલ 218.85 રૂપિયા પ્રતિ લિટર વેચાઈ રહ્યું છે, જ્યારે નેધરલેન્ડમાં તેની કિંમત 191.34 રૂપિયા થઈ ગઈ છે. આ સિવાય મોનાકોમાં તે 189 રૂપિયા, નોર્વેમાં 186.50 રૂપિયા અને ફિનલેન્ડમાં 179.14 રૂપિયા પ્રતિ લીટર પર પહોંચી ગય છે.
એક તરફ જે દેશોમાં સૌથી મોંઘુ પેટ્રોલ વેચાય છે તો બીજી તરફ એવા દેશો પણ છે જ્યાં એક લિટર પેટ્રોલની કિંમત રૂ.10થી પણ ઓછી છે. વેનેઝુએલામાં પેટ્રોલ 1.90 રૂપિયા પ્રતિ લીટર વેચાઈ રહ્યું છે. આ સિવાય લીબિયામાં પેટ્રોલ 2.43 રૂપિયા, ઈરાનમાં 3.89 રૂપિયા, સીરિયામાં 23.99 રૂપિયા અને અલ્જીરિયામાં 24.44 રૂપિયા પ્રતિ લિટરના ભાવે વેચાઈ રહ્યું છે.
કેન્દ્રીય પેટ્રોલિયમ મંત્રી હરદીપ સિંહ પુરીએ કહ્યું હતું કે વૈશ્વિક બજારના દબાણમાં દેશમાં તેલની કિંમતો વધી રહી છે. તેમણે કહ્યું કે જો આપણે એપ્રિલ 2021 થી માર્ચ 2022 સુધીના એક વર્ષની સરખામણી કરીએ તો દુનિયાના અન્ય દેશોની સરખામણીએ ભારતમાં કિંમતો બહુ ઓછી વધી છે. આ સમયગાળા દરમિયાન અમેરિકામાં પેટ્રોલના ભાવમાં 51 ટકા, કેનેડામાં 52 ટકા, જર્મનીમાં 55 ટકા, સ્પેનમાં 58 ટકા અને ફ્રાન્સમાં 50 ટકાનો વધારો થયો છે, જ્યારે ભારતમાં પેટ્રોલની કિંમતમાં માત્ર 5 ટકાનો વધારો થયો છે.